1Th 4 | KYG | STEP | Inagi konagatimogitapae, huta, lagaemo Goti'a hau'niya kava'mo hutapa maisayafe'mo alita lapaya male'none. Ani kava hutapa mai'nae. Hemenimo Ala kava ne'mo Yesuteti'mo lokiya gefati'mo lapao ke hetae'mo, mago'e hutapa alagepa kava'mo hutapa maiyo.

1 Thessalonians 4

Goti'a hau'niya kavafe'mo ava gemo hu'niya gemae

1 Inagi konagatimogitapae, huta, lagaemo Goti'a hau'niya kava'mo hutapa maisayafe'mo alita lapaya male'none. Ani kava hutapa mai'nae. Hemenimo Ala kava ne'mo Yesuteti'mo lokiya gefati'mo lapao ke hetae'mo, mago'e hutapa alagepa kava'mo hutapa maiyo. 2 Ala kava ne'mo Yesuteti'mo mani kava'mo hiyo, huta hu'nona gemo ago afi'nae. 3 Goti'a lapaote kava'mo hutapa kumai kavafe'mo maita halove hutapa atesayafe'mo hau'niye. 4 Lapakaemo Gotitegamo alagepa kava'mo huge vaya'aitegamo alagepa kava'mo huge nehutapae'mo lapamete lapamete hutapa atapimo aliyo. 5 Malaga vaya'mogi Goti'a o'age'naya vaya'mogimo apakufamo'mo hau'niya agufa kava'mo hu'a hapa'ye nehige'apae'mo a'mo ne'aliya kava osiyo. 6 Ani kavatefe'mo fiku yanage'a mago vaya'mogi konaga'apimogife'mo humi apatete'a ali'a hosu hu'a apategae. Hogoteta, Ala kava ne'mo'a kumai kava'mo anona'apilefe'mo apamigiye. Ehetapiye, huta ago lapa pai'none. 7 Ani kavatefe'mo Goti'a kumai hegekana agufa kava'mo hisunafe'mo keya o'ae'nifa laote alagepa kava'mo hisunafeke'mo keya ae'niye. 8 Keya ae'niya'mofe'mo mani gemo o'afi'naya vaya'mogimo ma mopafi vaya'aina apakame'ya no'apamifa Auneme'amo lami'niya Gotike'mo apakame'ya ne'amiye.

9 Goti'a konagatapie'mo lapau lapayamopafi'mo lapausiyafe'mo ago alino lapaya male'nigetapa afi'nayanageta lapaisiyafe'mo halate avo'mo kaesuva kava'mo ohane'niye. 10 He, lapakaemo muki Masetoniya kotega mai'naya konagatapie'mo lapau lapayamopafi'mo lapau'niya'monanafa konagatimogitapae, huta, lapao ke hetae'mo, mago'e mago'e huno lapaino, huta nehune. 11 Alagepa huta vase huta maigune, hutapa lapakesamo ne'afitapa lapakaitapi yate'mo alagepa hutapa yagaitapa ate'netapa ali'ya'mo aliyo, huta ago lapa pai'none. 12 Malaga vaya'aitegamo alagepa kava'mo hutetapa kafu osisayafe'mo ali'ya aliyo.

Ala kava ne'mo halate eminesiya kavafe'mo hu'niya gemae

13 Inagi konagatimogitapae, huta, mago vaya'mogimo, fali'naya vaya'mo he otigae, hu'a apakesamo ne'afiya'mofe'mo apakava o'maige apavayagunagu osuge hu'a lusi kava hu'a yulagefa ne'aiye. Ani agufa kava'mo osutapa fali'naya vaya'aife'mo lama gemae, hutapa afisayafe'mo nahau'niye. 14 Lagaemo, Yesu'a ago faliteno he ti'niye, huta lagesa afita fatago nehuna'mofe'mo Goti'a Yesupi'mo fali'naya vaya'e Yesu'e'mo apavalelino eminegaiye, huta lagesa afita fatago hugune. 15 Ala kava ne'mo'a, afa'a mai'naya vaya'mogimo fali'naya vaya'aina apatale'a hai'a hogo otegae, huno laha pai'niye. 16 Ala kava ne'mo koku'napati'mo emine'ne'eno'ae'mo alopa gefati'mo keya aeno ge nehisigeno'ae'mo enisole vaya'aite'mo yagaino ne'apateya enisole vekamo'a ge nehisigeno'ae'mo Goti pikulimo nehisigeno agai'amo eminegaiye. Emine'ne'esige'apae'mo Kalaisipi'mo mai'ne'a fali'nisaya vaya'mo hogote'a he tigae. 17 He netisageno'ae'mo agaemo afa'a mai'nona vaya'e'mo lavalesigeta apakaegi'e'mo magokepi lokaelita haita hiyapi'mo Ala kava ne'e'mo fotu huteta muki afina'mo agae'e'mo maige maige huta maigune. 18 Maiguna'mofe'mo mani geleti'mo konagatapimogi apaipamo alitapa falu hutapa apateyo.